Novas

18-09-2019 -

Entidades culturais, educativas e deportivas poden solicitar as axudas para as actividades organizadas en 2018

O Concello de Fene establece o prazo de solicitude ata o 1 de outubro ás 14:00 horas. Subvencionaranse gastos de funcionamento, mantemento e tamén de organización de eventos e actividades e desprazamentos

O alcalde, Gumersindo Galego, informou esta mañá da apertura do prazo de solicitude das subvencións en réxime de concorrencia competitiva que van dirixidas a entidades culturais, deportivas e educativas sen ánimo de lucro. Coas mesmas, poderán afrontar gastos de mantemento, funcionamento e organización de actividades correspondentes ao ano 2018 ou ao curso 2017/2018.
16-09-2019 -

Concentración violencia machista

Dende a Concellaría de Igualdade do Concello de Fene, convócase para mañán martes 17 de setembro de 2019 ao persoal do Concello, ao persoal político e a todas as persoas que desexen unirse, a unha concentración silenciosa ás 12:00 h na porta da Casa do Concello para manifestar públicamente a condea e rexeitamento polo TRIPLE ASASINATO POR VIOLENCIA MACHISTA DE SANDRA BOQUETE JAMARDO de 39 anos Xunto á súa nai, Mª ELENA FAJARDO FIGUEROA de 58 anos e á súa irmán ALBA BOQUETE FAJARDO de 27 anos Veciñas de Valga (Pontevedra)

Sandra, Mª Elena e Alba foron asasinadas este luns polo exmarido de Sandra, JOSÉ LUIS ABET LAFUENTE  de 41 anos, en Valga (Pontevedra) en presenza dos fillos de ambos de 4 e 7 anos de idade, pagando coas súas vidas a discriminación e a desigualdade que padecemos todas. Este feito constitúe o quinto acto de violencia machista en Galicia no que vai de ano dun total de 43 no resto de España. (Fuente MSSSI, 16/09/19).

Agradecemos de antemán a vosa asistencia como xesto de condea, repulsa e solidariedade.
16-09-2019 -

Rematan as obras na beira esquerda da avenida Marqués de Figueroa

O rexedor explicou que os traballos consistiron na construción de beirarrúas con baldosas de formigón e materiais táctiles no percorrido do paso de peóns, instalación de dous novos puntos de luz con tecnoloxía LED, colocación de alcorques e instalación dun suxeita colector de aceiro inoxidable.
16-09-2019 -

O Concello adhírese á campaña “20S Emerxencia Feminista” que alerta dun incremento da violencia machista

O Concello de Fene adheriuse á campaña “20S Emerxencia Feminista”, que plantea mobilizacións o 20 de setembro para alertar do incremento da violencia de xénero logo dun verán negro e un mes de xullo no que cada dous días foi asasinada unha muller en algún lugar de España.
13-09-2019 -

O Concello iluminarase de verde para visibilizar as patoloxías mitocondriais

O Concello de Fene vén de adherirse á iniciativa “Ilumina por las mitocondrias”, unha campaña de sensibilización coa que se pretenden dar a coñecer ás patoloxías mitocondriais.
Esta proposta parte da Asociación de Enfermos de Patologías Mitocondriales (AEPMI). Estas enfermidades, sen cura e que poden afectar a calquera idade e a calquera órgano e sistema do corpo, derivan dun fracaso no funcionamento das mitocondrias, que non xeran enerxía para manter a vida e o desenvolvemento dos órganos e sistemas.
A adhesión do Concello de Fene concretarase os días 14, 15 e 16 de setembro na iluminación do consistorio de cor verde, coincidindo cunha campaña internacional coa que ano tras ano se dá visibilidade a este tipo de patoloxías durante a Semana Mundial de Concienciación das Enfermidades Mitocondriais.
13-09-2019 -

O Concello de Fene pon en marcha este mes o obradoiro de emprego “Inicia IV”

Hoxe é a selección dos alumnos traballadores e a vindeira semana terá lugar a do persoal directivo e docente que impartirá a formación Fene, 13 de setembro de 2019. O Concello de Fene porá en marcha este mes o obradoiro de emprego de Garantía Xuvenil “INICIA IV”. Faino en conxunto con Ares, Mugardos, Neda e Cabanas, pois esta iniciativa formará a 16 alumnos destes concellos (7 de Fene, 3 de Ares, 3 de Mugardos, 2 de Neda e 1 de Cabanas).
12-09-2019 -

O Concello de Fene porá en marcha este mes o programa de envellecemento activo

O alcalde Gumersindo Galego informou hoxe de que o Concello de Fene abrirá a vindeira semana o prazo de inscricións aos obradoiros de Envellecemento Activo. Así, entre o luns 16 e o venres 27 de setembro, as persoas interesadas poderán formalizar a súa participación nestas actividades, que son de balde para os participantes e que se desenvolverán en locais das entidades sociais e culturais de Fene ou no Centro Municipal de Servizos Sociais entre o 30 de setembro e xuño. Os obradoiros só se realizarán se se reúnen un mínimo de 10 persoas por grupo e as prazas cubriranse por orde de inscrición.
12-09-2019 -

O plan municipal de rebacheos estendeuse ao longo de 35 pistas e camiños de Fene

O Concello de Fene vén de rematar as actuacións previstas no plan de rebacheos realizado en diversas pistas e camiños das diferentes parroquias do municipio e que contemplou máis de 35 actuacións. Estas obras contaron cun orzamento de 35.859,56 euros.

En concreto, explica o alcalde, Gumersindo Galego, os traballos consistiron nun rebacheo de firme asfáltico. Actuouse en varias pistas do concello co obxectivo de acondicionalas, atendendo así ás demandas dos veciños ante o estado das mesmas.

Na parroquia de Fene realizáronse catro actuacións; seis en Barallobre; cinco en Magalofes; seis en Maniños; cinco en Perlío; dúas en Sillobre; e sete en Limodre, segundo as previsións deste plan de rebacheo.
12-09-2019 -

O Concello presenta ás entidades sociais o programa de Envellecemento Activo

O Concello de Fene, a través da Concellería de Benestar Social e Igualdade, convocou hoxe ás 12:00 horas ás entidades sociais para presentar o programa de Envellecemento Activo, no que se enmarca a iniciativa Tardes Activas.

Participan nesta reunión a concelleira de Benestar Social, Tamara Miragaya López, e a técnica responsable do programa, María José Paz Rodríguez. Ademais, están convocadas as persoas que integran as directivas das entidades.
10-09-2019 -

O Concello abre o prazo de matrícula nas escolas deportivas a próxima semana

O Concello de Fene abrirá a vindeira semana o prazo de inscrición nas escolas deportivas municipais que se celebrarán no curso 2019/2020, que se estenderá dende o 1 de outubro ata mediados ou finais de xuño, segundo os casos.

Este ano, o Concello de Fene ofrece un amplo abano de actividades, coma atletismo, pequedeporte, baloncesto, ximnasia rítmica, baile moderno, patinaxe, zumba, pilates, rehabilitación funcional, judo, karate e ioga. Na piscina, ofrécese aquagym e natación para todas as idades (dende bebés ata maiores), para embarazadas, para o postparto e mesmo natación terapéutica.